संतनगरी शेगावात भक्तीचा महापूर……

संतनगरी शेगावात भक्तीचा महापूर…..

शेगाव :- प्रतिनिधी – वर्षाच्या शेवटच्या गुरुवारी श्री संत गजानन महाराज मंदिरात लाखो भाविकांची ऐतिहासिक गर्दी..

संतनगरी शेगाव येथे आज गुरुवारी भक्तीचा महापूर उसळल्याचे चित्र पाहायला मिळाले. आज गुरुवार हा वर्षाचा शेवटचा गुरुवार असल्याने श्री संत गजानन महाराजांच्या दर्शनासाठी लाखोंच्या संख्येने भाविक शेगाव नगरीत दाखल झाले. आज २५ डिसेंबर २०२५ रोजी पहाटेपासूनच मंदिर परिसरात भाविकांची प्रचंड गर्दी पाहायला मिळत आहे.
गुरुवार हा गजानन भक्तांसाठी विशेष महत्वाचा दिवस मानला जातो. दर गुरुवारी महाराजांच्या दर्शनासाठी भाविक मोठ्या संख्येने येतात; मात्र वर्षाच्या शेवटच्या गुरुवारी दर्शनासाठी येणाऱ्या भाविकांची संख्या लक्षणीयरीत्या वाढलेली दिसून आली. महाराष्ट्रासह विदर्भ, मराठवाडा तसेच राज्याबाहेरील अनेक भागांतून भाविक शेगावात दाखल झाले आहेत.
आनंद सागरपासून थेट श्री संत गजानन महाराज मंदिरापर्यंत दर्शन रांगा लागल्या असून भाविक शिस्तबद्ध पद्धतीने दर्शनासाठी उभे आहेत. “गण गण गणात बोते” या जयघोषाने संपूर्ण शेगाव नगरी भक्तीमय वातावरणाने दुमदुमून गेली आहे. दीर्घ रांगेत उभे असतानाही भाविकांमध्ये उत्साह, श्रद्धा आणि आनंदाचे वातावरण पाहायला मिळत आहे.
भाविकांची वाढती गर्दी लक्षात घेता श्री संत गजानन महाराज संस्थानकडून दर्शन व्यवस्थेसाठी विशेष नियोजन करण्यात आले आहे. सुरक्षा व्यवस्था, स्वयंसेवकांची मदत, पाणीपुरवठा, वैद्यकीय सुविधा तसेच वाहतूक नियंत्रणासाठी प्रशासन सज्ज असल्याचे चित्र आहे. भाविकांची गैरसोय होऊ नये यासाठी संस्थानचे सेवेकरी अहोरात्र कार्यरत आहेत.

संपूर्ण शेगाव नगरी आज भक्ती, श्रद्धा आणि शांतीच्या वातावरणात न्हालेली असून श्री संत गजानन महाराजांच्या कृपेने दर्शन घेतल्याचे समाधान भाविकांच्या चेहऱ्यावर स्पष्टपणे दिसून येत आहे.