छत्रपती संभाजीनगर प्रतिनिधी : गोकुळसिंग राजपूत
इद्रिस मुलतानी यांच्या सातत्यपूर्ण पाठपुराव्याला यश;
सभागृह, रस्ता, स्वच्छतागृह, प्रसाद व्यवस्था, संरक्षण भिंत व पथदिव्यांची कामे होणार
सावळदबारा : सोयगाव तालुक्यातील सावळदबारा (सावळेद्वार) येथील ऐतिहासिक व धार्मिक महत्त्व असलेल्या चक्रधर स्वामी मंदिराच्या सर्वांगीण विकासासाठी पहिल्या टप्प्यात तब्बल २ कोटी ४५ लाख रुपयांच्या विविध विकासकामांना मंजुरी मिळाली आहे. त्यामुळे अनेक वर्षांपासून विकासाच्या प्रतीक्षेत असलेल्या मंदिर परिसराच्या विकासाला आता मोठी चालना मिळणार आहे. या विकासकामांसाठी इद्रिस मुलतानी यांनी शासन स्तरावर सातत्याने पाठपुरावा केला होता. त्यांच्या प्रयत्नांना अखेर यश मिळाले आहे.
ग्रामविकास व पंचायत राज मंत्री ना. जयकुमार गोरे यांच्या मार्गदर्शनाखाली, इतर मागास बहुजन कल्याण विकास मंत्री ना. अतुलजी सावे तसेच माजी केंद्रीय मंत्री रावसाहेब पाटील दानवे यांच्या सहकार्याने या विकासकामांना मंजुरी मिळाल्याचे सांगण्यात आले. मंदिराला ‘ब’ वर्गाचा दर्जा मिळवून देण्यासाठीही इद्रिस मुलतानी यांनी विशेष प्रयत्न केले होते. त्यांच्या सातत्यपूर्ण पाठपुराव्यामुळे मंदिराला ‘ब’ वर्गाचा दर्जा प्राप्त झाला असून, त्यानंतर मंदिर परिसरातील मूलभूत सुविधांसाठी त्यांनी शासनाकडे पाठपुरावा सुरू ठेवला.
विविध विकासकामांना निधी
शासनाने मंजूर केलेल्या निधीतून मंदिर परिसरात विविध महत्त्वाची कामे करण्यात येणार आहेत. यामध्ये सभागृह बांधकामासाठी १ कोटी रुपये, रस्ता, स्वच्छतागृह व प्रसाद व्यवस्थेसाठी ५० लाख रुपये, मंदिराच्या संरक्षण भिंतीसाठी ५० लाख रुपये, तर पथदिव्यांसाठी २५ लाख रुपये अशा विविध कामांचा समावेश आहे.
या कामांमुळे मंदिर परिसराचे स्वरूप बदलणार असून, भाविकांसाठी आवश्यक असलेल्या सोयी-सुविधांमध्ये मोठी भर पडणार आहे. मंदिरात येणाऱ्या भाविकांना बसण्यासाठी व धार्मिक कार्यक्रमांसाठी सभागृहाची सुविधा उपलब्ध होणार आहे. तसेच स्वच्छतागृह, प्रसाद व्यवस्था, अंतर्गत रस्ते, संरक्षण भिंत आणि पथदिवे यामुळे मंदिर परिसर अधिक सुरक्षित, स्वच्छ आणि सुस्थितीत होण्यास मदत होणार आहे.
धार्मिक पर्यटनाला मिळणार चालना
चक्रधर स्वामी मंदिराला ऐतिहासिक व धार्मिक महत्त्व असून, परिसरातील भाविक मोठ्या श्रद्धेने या ठिकाणी भेट देतात. मंदिराच्या विकासासाठी मोठ्या प्रमाणात निधी मंजूर झाल्यामुळे भविष्यात या परिसरातील धार्मिक पर्यटनालाही चालना मिळण्याची अपेक्षा व्यक्त केली जात आहे. मंदिर परिसरात भाविकांसाठी चांगल्या सुविधा निर्माण झाल्यास बाहेरील जिल्ह्यांतून येणाऱ्या भाविकांची संख्याही वाढण्यास मदत होऊ शकते.
फर्दापूर जिल्हा परिषद गटातील विविध विकासकामांसाठी इद्रिस मुलतानी यांनी सातत्याने शासन स्तरावर पाठपुरावा केला आहे. चक्रधर स्वामी मंदिराला ‘ब’ वर्गाचा दर्जा मिळाल्यानंतर मंदिराच्या विकासासाठी आवश्यक असलेल्या कामांचा आराखडा व निधी मंजुरीसाठी त्यांनी प्रयत्न सुरू ठेवले. अखेर पहिल्या टप्प्यात सुमारे अडीच कोटी रुपयांचा निधी मंजूर झाल्याने सावळदबारा परिसरातील नागरिक व भाविकांमध्ये समाधान व्यक्त होत आहे.
प्रा. जीवन कोलते-पाटील व पुजारी मंडळींकडून आभार
मंदिराच्या विकासासाठी निधी मंजूर झाल्याबद्दल प्रा. जीवन कोलते-पाटील तसेच मंदिरातील पुजारी मंडळींनी शासनाचे आणि विकासकामांसाठी पाठपुरावा करणाऱ्या इद्रिस मुलतानी यांचे आभार मानले. मंदिराच्या विकासामुळे सावळदबारा गावाच्या धार्मिक महत्त्वात आणखी भर पडणार असून, परिसरातील नागरिकांसाठीही ही विकासकामे महत्त्वाची ठरणार असल्याचे त्यांनी सांगितले.
पुढील टप्प्यातही विकासकामांसाठी पाठपुरावा
फर्दापूर जिल्हा परिषद गटाच्या सर्वांगीण विकासासाठी आगामी काळातही विविध विकासकामांसाठी पाठपुरावा सुरू ठेवण्यात येणार असल्याची माहिती इद्रिस मुलतानी यांनी दिली. धार्मिक स्थळांचा विकास, मूलभूत सुविधा, रस्ते तसेच नागरिकांच्या आवश्यक सोयी-सुविधांसाठी शासनाच्या माध्यमातून निधी उपलब्ध करून देण्यासाठी प्रयत्न सुरू राहतील, असे त्यांनी स्पष्ट केले.
सावळदबारा येथील चक्रधर स्वामी मंदिरासाठी मंजूर झालेल्या २ कोटी ४५ लाख रुपयांच्या निधीमुळे मंदिर परिसराच्या विकासाला मोठी गती मिळणार असून, या कामांकडे आता भाविक व ग्रामस्थांचे लक्ष लागले आहे.
