लोक महाराष्ट्र न्यूज प्रतिनिधी
सामाजिक अन्याय, विषमता आणि शोषणाविरोधात उभ्या राहिलेल्या दलित पँथर चळवळीचा इतिहास आता रुपेरी पडद्यावर पाहायला मिळणार आहे. ‘मिशन पँथर 1970’ या आगामी चित्रपटाचे पहिले पोस्टर नुकतेच प्रदर्शित करण्यात आले. अभिता फिल्म प्रॉडक्शन्सची निर्मिती असलेल्या या चित्रपटाचे पोस्टर निर्माते आणि अभिता फिल्म प्रॉडक्शन्सचे CEO सुनील शेळके तसेच दिग्दर्शक शैलेंद्र बागडे यांच्या हस्ते प्रदर्शित करण्यात आले.
1970च्या दशकात महाराष्ट्राच्या सामाजिक आणि राजकीय अवकाशात दलित पँथर चळवळीने एक वेगळीच अस्वस्थता निर्माण केली होती. जातीय अत्याचार, सामाजिक विषमता, शोषण आणि अन्यायाविरोधात आक्रमकपणे आवाज उठवत या चळवळीने सामाजिक न्यायाच्या लढ्याला नवी दिशा दिली.
‘मिशन पँथर 1970’ या चित्रपटातून याच ऐतिहासिक पार्श्वभूमीचा वेध घेण्याचा प्रयत्न करण्यात आला आहे. केवळ एका चळवळीची कथा म्हणून नव्हे, तर अन्यायाविरोधात उभ्या राहिलेल्या संघर्षाचा, विचारांचा आणि सामाजिक परिवर्तनाच्या प्रक्रियेचा प्रवास या चित्रपटातून मांडला जाणार असल्याचे निर्मात्यांकडून सांगण्यात आले आहे. दलित पँथर चळवळीचा सामाजिक इतिहास, त्या काळातील परिस्थिती आणि परिवर्तनाची गरज नव्या पिढीसमोर मांडण्याचा प्रयत्न या चित्रपटातून करण्यात येत आहे.
‘मिशन पँथर 1970’मध्ये अभिनेता चिन्मय मांडलेकर मुख्य भूमिकेत दिसणार आहेत. त्यांच्यासोबत अंजली पाटील, कैलास वाघमारे, कमलेश सावंत, संदेश जाधव, विनीत शर्मा, किरण बागडे, पार्थ तिवारी, अंकुश गेडाम आणि गणेश देशमुख हे कलाकार महत्त्वाच्या भूमिकांमध्ये दिसणार आहेत. सामाजिक आशय असलेल्या कथानकासोबतच अनुभवी आणि दमदार कलाकारांची फळी असल्यामुळे या चित्रपटाकडे चित्रपटप्रेमींचे लक्ष लागले आहे
‘मिशन पँथर 1970’चे आणखी एक वैशिष्ट्य म्हणजे हा चित्रपट केवळ मराठी भाषेत प्रदर्शित होणार नाही. मराठीसोबत हिंदी, तेलुगू, तमिळ आणि कन्नड अशा एकूण पाच भाषांमध्ये हा चित्रपट प्रदर्शित करण्यात येणार आहे. त्यामुळे महाराष्ट्राच्या सामाजिक इतिहासातील एका महत्त्वाच्या चळवळीची कथा देशभरातील प्रेक्षकांपर्यंत पोहोचण्याची शक्यता आहे. विशेषतः दलित पँथर चळवळीचा प्रभाव आणि तिच्या विचारांची सामाजिक पार्श्वभूमी महाराष्ट्राबाहेरील प्रेक्षकांसमोर मांडण्याची संधी या चित्रपटाच्या माध्यमातून मिळणार आहे.
निर्माते सुनिल शेळके यांनी यापूर्वी ‘सत्यशोधक’ या चित्रपटातून महात्मा ज्योतिराव फुले आणि क्रांतिज्योती सावित्रीबाई फुले यांच्या सामाजिक कार्याचा आणि विचारांचा इतिहास रुपेरी पडद्यावर मांडला होता. त्यानंतर आता सामाजिक न्यायाच्या चळवळीतील आणखी एका महत्त्वाच्या अध्यायाकडे त्यांनी मोर्चा वळवला आहे. दलित पँथर चळवळ ही केवळ एका काळातील राजकीय-सामाजिक घटना नव्हती, तर जातीय अन्याय आणि विषमतेविरोधातील प्रतिकाराची एक महत्त्वाची अभिव्यक्ती होती. त्यामुळे या चळवळीचा इतिहास चित्रपटाच्या माध्यमातून कितपत प्रभावीपणे मांडला जातो, याकडेही प्रेक्षक आणि सामाजिक क्षेत्राचे लक्ष राहणार आहे. ‘मिशन पँथर 1970’च्या प्रदर्शनाची अधिकृत तारीख अद्याप जाहीर करण्यात आलेली नाही. मात्र पाच भाषांमध्ये संपूर्ण भारतात चित्रपट प्रदर्शित करण्याची तयारी असल्याने या चित्रपटाची व्याप्ती मोठी असणार आहे. सामाजिक न्याय, समता आणि परिवर्तनासाठी उभ्या राहिलेल्या एका ऐतिहासिक चळवळीचा संघर्ष नव्या पिढीपर्यंत पोहोचवण्याचा प्रयत्न म्हणून ‘मिशन पँथर 1970’कडे पाहिले जात आहे. आता या ऐतिहासिक संघर्षाची कथा रुपेरी पडद्यावर नेमक्या कोणत्या पद्धतीने मांडली जाते, हे चित्रपट प्रदर्शित झाल्यानंतर स्पष्ट होईल.
