सोयगाव प्रतिनिधी गोकुळसिंग राजपूत
राजलक्ष्मी संघ उपविजेता; अंतिम सामन्यास प्रेक्षकांची विक्रमी उपस्थिती
सोयगाव तालुक्यातील सावळदबारा येथील गावामध्ये दरवर्षीप्रमाणे आयोजित करण्यात येणाऱ्या सावळदबारा प्रीमियर लीग (SPL) क्रिकेट स्पर्धेचा यंदाचा तिसरा हंगाम (सीजन-3) अत्यंत उत्साहात पार पडला. या स्पर्धेमध्ये एकूण सहा संघांनी सहभाग नोंदवत रंगतदार सामने खेळले.
स्पर्धेचा अंतिम सामना अत्यंत थरारक वातावरणात पार पडला. या अंतिम लढतीत जय मल्हार सुपर किंग्स या संघाने उत्कृष्ट खेळाचे प्रदर्शन करत विजेतेपद पटकावले. या विजेत्या संघाचे ओनर मनोज शिवाजीराव बुढाळ होते. संघातील खेळाडूंनी सुरुवातीपासूनच आक्रमक आणि शिस्तबद्ध खेळ करत प्रतिस्पर्धी संघावर वर्चस्व राखले.
तर अंतिम सामन्यात चांगली झुंज देत राजलक्ष्मी संघाने उपविजेतेपद मिळवले. या संघाचे ओनर शुभम मधुकर पुजारी होते. राजलक्ष्मी संघाने संपूर्ण स्पर्धेत सातत्यपूर्ण कामगिरी करत अंतिम फेरी गाठली, मात्र अंतिम सामन्यात त्यांना थोडक्यात पराभव पत्करावा लागला.
या स्पर्धेचे विशेष आकर्षण म्हणजे अंतिम सामना पाहण्यासाठी सावळदबारा तसेच परिसरातील गावांमधून क्रिकेटप्रेमी मोठ्या संख्येने उपस्थित होते. प्रेक्षकांनी मैदानावर उत्साहपूर्ण वातावरण निर्माण करत खेळाडूंना जोरदार पाठिंबा दिला. टाळ्यांचा कडकडाट, जल्लोष आणि घोषणांनी संपूर्ण परिसर दुमदुमून गेला.
संपूर्ण स्पर्धा शिस्तबद्ध व नियोजनबद्ध पद्धतीने पार पडली. स्थानिक युवकांनी पुढाकार घेत ही स्पर्धा यशस्वी केली. सावळदबारा प्रीमियर लीगमुळे गावातील तरुणांना आपली क्रिकेट प्रतिभा दाखवण्याचे व्यासपीठ मिळत असून, क्रीडा संस्कृतीला चालना मिळत असल्याचे मत उपस्थितांनी व्यक्त केले.
स्पर्धेच्या यशस्वी आयोजनाबद्दल आयोजकांचे सर्वत्र कौतुक होत असून, पुढील वर्षी ही स्पर्धा आणखी मोठ्या प्रमाणात आयोजित करण्याचा निर्धार आयोजकांनी व्यक्त केला आहे.
Loading ...