चिखली/(लोकमहाराष्ट्र न्यूज):-
छत्रपती संभाजी महाराज यांच्या शौर्याचे प्रतीक असलेल्या शिलालेखासमोर उभारण्यात आलेले बेकायदेशीर राजकीय फलक अखेर हटवण्यात आले. लोकमहाराष्ट्र न्यूजने या गंभीर विषयावर निर्भीडपणे वृत्त प्रकाशित करताच नगरपालिका प्रशासनाला जाग आली आणि काही तासांतच संबंधित फलक काढून टाकण्यात आले. प्रशासनाच्या निष्क्रियतेवर लोकमहाराष्ट्र न्यूजने उघडपणे बोट ठेवताच कारवाईला गती मिळाली—हे या घटनेतून पुन्हा एकदा स्पष्ट झाले.
शहराच्या दर्शनीय भागात असलेल्या छत्रपती संभाजी महाराजांच्या शौर्य शिलालेखासमोर नियम धाब्यावर बसवून फलक लावण्यात आले होते. वारंवार तक्रारी होऊनही नगरपालिका आणि संबंधित विभागांनी दुर्लक्ष केल्याचा आरोप नागरिकांकडून केला जात होता. ऐतिहासिक आणि भावनिक महत्त्व असलेल्या स्थळावर राजकीय स्वार्थासाठी विद्रूप करणारी ही कृती सर्वसामान्यांच्या भावना दुखावणारी होती.
या पार्श्वभूमीवर लोकमहाराष्ट्र न्यूजने वस्तुस्थिती मांडत, नियमबाह्य फलकांमुळे शिलालेखाची अवहेलना कशी होत आहे, याचे ठोस पुराव्यांसह वृत्त प्रसिद्ध केले. वृत्त प्रकाशित होताच प्रशासन खडबडून जागे झाले. नगरपालिकेच्या पथकाने तातडीने घटनास्थळी धाव घेत बेकायदेशीर फलक हटवले. कारवाईनंतर शौर्य शिलालेख परिसर मोकळा झाला असून, नागरिकांनी सुटकेचा निश्वास सोडला.
या प्रकरणामुळे एक प्रश्न मात्र ऐरणीवर आला आहे—वृत्तपत्राने आवाज उठवल्याशिवाय प्रशासन कारवाई का करत नाही? नियम सर्वांसाठी सारखे असतील तर अशा बेकायदेशीर फलकांना आधीच परवानगी कशी दिली जाते? आणि परवानगी नसताना ते उभे राहतच कसे?
दरम्यान, स्थानिक नागरिक, इतिहासप्रेमी आणि शिवप्रेमींनी लोकमहाराष्ट्र न्यूजच्या निर्भीड भूमिकेचे स्वागत केले आहे. “छत्रपती संभाजी महाराजांचा सन्मान राखण्यासाठी लोकमहाराष्ट्र न्यूज ने दाखवलेली ही जागरूकता कौतुकास्पद आहे,” अशी प्रतिक्रिया अनेकांनी व्यक्त केली.
लोकमहाराष्ट्र न्यूज स्पष्ट करतो—शहरातील ऐतिहासिक महापुरुष स्थळ, सार्वजनिक जागा आणि कायद्याची पायमल्ली कुठेही सहन केली जाणार नाही. प्रशासनाने यापुढेही नियमांची अंमलबजावणी सातत्याने करावी, अन्यथा जनतेच्या वतीने आवाज उठवला जाईल—हा इशारा या घटनेतून पुन्हा एकदा ठामपणे दिला आहे.
Loading ...